हातात हात दे तू

हातात हात दे तु, श्वासात श्वास दे तू।
नाते मनाचे मनासी, हलकेच जुळवून दे तू।

मी बावळा मुका प्रेमवेडा, काहीच मजला सखे बोलवेना,
भाषा मनाची मनाने समजूनी, सादेस साद दे तू।

तू ओढ माझी समजून घेना, तू मन माझे जाणून घेना,
सोडूनी लाजभीड, सर्वस्व माझ्या, मिठीत झोकून दे तू।

तुझा स्पर्श माझ्या जगण्याची उभारी, तुझे हास्य मझ्या चेहय्राची झळाळी,
मझी सर्व सुखे घेऊनी सखे, मला तुझी दु:खे दे तू।

मी तहानलेला तुझ्या प्रेमाचा, मी सदा भुकेला तुझ्या स्पर्शाचा,
आतुरलेल्या ओठांस माझ्या, तुझ्या ओठांचा जाम दे तू।

नाते नव्हे हे सखे क्षणांचे, असे हे बंधन युगानुयुगांचे,
ऊनसावली असो वा असो सुख-दु:ख, सदैव मज साथ दे तू ।